Saudi Bus Tragedy: సౌదీ అరేబియాలో జరిగిన దారుణ రోడ్డు ప్రమాదం (road accident)హైదరాబాద్ నగరాన్ని, ముఖ్యంగా విద్యానగర్ ప్రాంతాన్ని విషాదంలో ముంచేసింది. ఉమ్రా యాత్ర(Umrah pilgrimage)కు వెళ్లిన ఒకే కుటుంబానికి చెందిన 18 మంది సభ్యులు ఈ హృదయ విదారక ఘటనలో ప్రాణాలు కోల్పోవడం స్థానికులను తీవ్రంగా కలచివేసింది. మూడు తరాల వారు ఒకే సంఘటనలో ప్రాణాలు కోల్పోవడం మరింత మానసిక వేదన కలిగిస్తోంది. వివరాల ప్రకారం, విద్యానగర్‌లో నివసిస్తున్న రిటైర్డ్ రైల్వే ఉద్యోగి నజీరుద్దీన్ కుటుంబ సభ్యులను పూర్తిగా సమీకరించి ఈ నెల 9న ఉమ్రా యాత్రకు బయలుదేరారు. ఆయనతో పాటు భార్య, కుమారుడు సల్లావుద్దీన్, ముగ్గురు కుమార్తెలు, వారి జీవిత భాగస్వాములు మరియు పిల్లలు మొత్తంగా 18 మంది ఈ ఆధ్యాత్మిక యాత్రలో పాల్గొన్నారు. మక్కాలో ఉమ్రా కార్యక్రమాలు ముగించుకుని మదీనాకు వెళ్తున్న సమయంలో వారు ప్రయాణిస్తున్న బస్సు దురదృష్టవశాత్తు ప్రమాదానికి గురైంది.
ఈ ప్రమాదంలో అందరూ మరణించగా, అందులో రెండు నుండి పన్నెండు సంవత్సరాల మధ్య వయసు గల చిన్నారులు కూడా ఉండటం హృదయాన్ని ముక్కల్ని చేసే అంశంగా మారింది. అమెరికాలో ఉంటున్న నజీరుద్దీన్ పెద్ద కుమారుడు సిరాజుద్దీన్ ఈ ప్రయాణానికి రాకపోవడంతో కుటుంబంలో బ్రతికి మిగిలింది ఆయనే ఒక్కరు కావడం విషాదాన్ని మరింత ముదిరేలా చేస్తోంది. ప్రమాదానికి ముందు రోజు రాత్రి నజీరుద్దీన్ హైదరాబాద్‌లో ఉన్న బంధువులతో మాట్లాడి, మక్కాలో యాత్ర ముగిసిందని, మదీనాకు వెళ్లాల్సి ఉందని చెప్పారట. అవే ఆయన చివరి మాటలయ్యాయి. కుటుంబం అంతా ఒక్కసారిగా బయలుదేరవద్దని ముందే చెప్పినా వినిపించలేదని నజీరుద్దీన్ సోదరుడు సయ్యద్ రషీద్ కన్నీరుమున్నీరయ్యారు. ఒక్కసారి అన్ని తరాలూ కలిసి ప్రయాణించడం మంచిది కాదని చెప్పినా, అదృష్టం అలా కలిసిరాలేదు అని బాధతో తెలిపారు.
దారుణ ఘటన వార్త తెలిసిన వెంటనే పలువురు రాజకీయ నాయకులు విద్యానగర్‌లోని కుటుంబ ఇంటికి చేరుకుని బంధువులను పరామర్శించారు. పీసీసీ అధ‍్యక్షుడు మహేశ్‌కుమార్ గౌడ్, ఎంపీ అనిల్‌కుమార్ యాదవ్, ఎమ్మెల్యేలైన ముఠా గోపాల్, రెహ్మత్ బేగ్ అక్కడికి వెళ్లి బాధితులను ఓదార్చారు. కేంద్ర మంత్రి కిషన్‌రెడ్డి టెలిఫోన్ ద్వారా పరామర్శించి, కుటుంబానికి ప్రభుత్వపరమైన సహాయం అందించేందుకు చర్యలు తీసుకుంటామని భరోసా ఇచ్చారు. ఈ ఘటనతో విద్యానగర్ ప్రాంతం నిండా విషాద వాతావరణం ఏర్పడింది. ప్రతి ఇంటా ఈ కుటుంబ కథ వినిపిస్తూ, ప్రాంతం మొత్తం శోకసంద్రంగా మారిపోయింది.
