Hyderabad : ముఖ్యమంత్రి రేవంత్ రెడ్డి ప్రభుత్వ(CM Revanth Reddy government) ఆధ్వర్యంలో మొదటిసారి ఆవిష్కృతమైన ‘తెలంగాణ రైజింగ్ గ్లోబల్ సమ్మిట్’(Telangana Rising Global Summit) తొలి రోజే పెట్టుబడుల(Investments) ప్రవాహంతో సందడి చేసింది. సోమవారం ఫ్యూచర్ సిటీలో ఘనంగా ప్రారంభమైన ఈ ప్రపంచ సమ్మిట్‌లో, దేశీయ, అంతర్జాతీయ సంస్థలు భారీగా ఆసక్తి చూపాయి. సదస్సు ప్రారంభమైన కొద్ది గంటల్లోనే 35కు పైగా ప్రముఖ కంపెనీలు మొత్తం రూ.2.43 లక్షల కోట్లకు పైగా పెట్టుబడుల ఒప్పందాలు కుదుర్చుకోవడం రాష్ట్ర పారిశ్రామిక రంగానికి భారీ ఊతమిచ్చింది. దావోస్ వంటి అంతర్జాతీయ వేదికలకు వెళ్లి పెట్టుబడులను ఆకర్షించే పాత విధానాన్ని మార్చుతూ, ఈసారి ప్రపంచాన్ని హైదరాబాద్‌కు తీసుకువస్తున్నామని సీఎం రేవంత్ రెడ్డి ముందే ప్రకటించిన సంగతి తెలిసిందే. ఇప్పుడు ఆ ప్రయత్నం విజయవంతమైందని పారిశ్రామిక వర్గాలు అభిప్రాయపడుతున్నాయి. దావోస్‌ను హైదరాబాద్‌కు రప్పించిన ప్రభుత్వంగా రేవంత్ సర్కార్ నిలిచిందని పలువురు పరిశ్రమాధిపతులు ప్రశంసించారు.
సమ్మిట్ ప్రారంభోత్సవానికి గవర్నర్ జిష్ణుదేవ్ వర్మ ముఖ్య అతిథిగా హాజరయ్యారు. ఆయనతో పాటు సీఎం రేవంత్ రెడ్డి, డిప్యూటీ సీఎం భట్టి విక్రమార్క, కేంద్ర మంత్రి కిషన్ రెడ్డి, కర్ణాటక ఉప ముఖ్యమంత్రి డీకే శివకుమార్, నోబెల్ బహుమతి గ్రహీత కైలాశ్ సత్యార్థి తదితరులు పాల్గొన్నారు. రాష్ట్ర అభివృద్ధిపై రేవంత్ రెడ్డి చూపిస్తున్న దూరదృష్టిని పలువురు అంతర్జాతీయ ప్రతినిధులు ప్రశంసించారు. అమెరికా అధ్యక్షుడు డొనాల్డ్ ట్రంప్‌కు చెందిన ‘ట్రంప్ మీడియా అండ్ టెక్నాలజీ గ్రూప్’ రూ.41 వేల కోట్ల భారీ పెట్టుబడిని ప్రకటించడం ఈ సమ్మిట్‌లో ప్రధాన ఆకర్షణగా నిలిచింది. రాబోయే పదేళ్లలో మా పెట్టుబడులను లక్ష కోట్ల వరకూ విస్తరిస్తాం అని సంస్థ డైరెక్టర్ ఎరిక్ స్విడర్ వెల్లడించారు. అదే విధంగా బ్రూక్‌ఫీల్డ్, యాక్సిస్ వెంచర్స్ కూటమి గ్లోబల్ రీసెర్చ్ సెంటర్, డీప్ టెక్ హబ్ స్థాపనకు రూ.75 వేల కోట్ల పెట్టుబడికి అంగీకరించింది. పునరుత్పాదక ఇంధన రంగంలో విన్ గ్రూప్ రూ.27,000 కోట్లు, ఇంధన రంగమంతా కలిపి లక్ష కోట్లకుపైగా పెట్టుబడులు రావడం రాష్ట్ర ఎనర్జీ రంగాన్ని మరింత బలపరచనుంది.
ఏరోస్పేస్, డిఫెన్స్ విభాగాల్లో జీఎంఆర్ గ్రూప్ రూ.15,000 కోట్లు, అపోలో మైక్రో సిస్టమ్స్ రూ.1,500 కోట్లు పెట్టుబడి పెట్టేందుకు ముందుకొచ్చాయి. అదనంగా, అపోలో గ్రూప్ విద్య మరియు వైద్య రంగాల్లో పెట్టుబడులకు ఒప్పందం కుదుర్చుకుంది. రిలయన్స్‌కు చెందిన వంతారా హైదరాబాద్‌లో కొత్త జూ పార్క్ ఏర్పాటు చేసేందుకు అంగీకరించడం పర్యావరణ పర్యాటక రంగానికి ప్రోత్సాహాన్ని అందించనుంది. ఐటీ, ఆర్టిఫిషియల్ ఇంటెలిజెన్స్, గ్రీన్ ఎనర్జీ, విద్య, హెల్త్‌కేర్, పర్యాటకం వంటి విభిన్న రంగాల్లో వందలాది ప్రతినిధులు ఆసక్తి చూపడంతో సదస్సు ప్రాంగణం కిక్కిరిసిపోయింది. సమ్మిట్ మొదటి రోజే ఇంత భారీ పెట్టుబడులు రావడం రాష్ట్ర ఆర్థిక పురోగతికి పెద్ద మైలురాయిగా నిలిచిందని అధికార వర్గాలు భావిస్తున్నాయి. తెలంగాణను గ్లోబల్ ఇన్నోవేషన్ హబ్‌గా తీర్చిదిద్దాలన్న లక్ష్యంతో రేవంత్ ప్రభుత్వం చేపట్టిన ప్రయత్నాలకు ఈ సదస్సు తొలి రోజే విజయవేణులు వినిపించిందని పరిశ్రమ వర్గాలు పేర్కొంటున్నాయి.
