America: ప్రఖ్యాత బ్రిటిష్ వార్తా సంస్థ బీబీసీ(BBC)పై అమెరికా అధ్యక్షుడు డొనాల్డ్ ట్రంప్(President Donald Trump) తీవ్ర ఆరోపణలు చేశారు. తాను అసలు చెప్పని మాటలను తనకు ఆపాదిస్తూ బీబీసీ తప్పుడు కథనాన్ని ప్రసారం చేసిందని, దీనిలో ఆర్టిఫిషియల్ ఇంటెలిజెన్స్ (Artificial Intelligence)(ఏఐ) వంటి ఆధునిక సాంకేతికతను ఉపయోగించి ఉండవచ్చని అనుమానం వ్యక్తం చేశారు. ఈ వ్యవహారంపై బీబీసీపై న్యాయపరమైన చర్యలు చేపట్టనున్నట్లు ఆయన ప్రకటించడం రాజకీయ వర్గాల్లో కలకలం రేపింది. వైట్హౌస్లో జరిగిన ఒక కార్యక్రమం అనంతరం మీడియాతో మాట్లాడిన ట్రంప్, బీబీసీ తన వ్యాఖ్యలను వక్రీకరించిందని మండిపడ్డారు. నేను ఎప్పుడూ మాట్లాడని భయంకరమైన మాటలను నా నోట పలికినట్లు చూపించారు.
ఇది జర్నలిజం విలువలకు విరుద్ధం. బహుశా వారు ఏఐ లేదా ఇలాంటి సాంకేతికతను ఉపయోగించి ఈ తప్పుడు వ్యాఖ్యలను సృష్టించి ఉండవచ్చు అని ఆయన ఆరోపించారు. ముఖ్యంగా జనవరి 6, 2021న అమెరికా క్యాపిటల్ భవనంపై జరిగిన దాడి ఘటనకు సంబంధించిన సందర్భంలో తాను దేశభక్తి గురించి చేసిన సానుకూల వ్యాఖ్యలను పూర్తిగా వదిలేసి, తాను అనని మాటలను మాత్రమే ప్రసారం చేశారని ట్రంప్ ఆగ్రహం వ్యక్తం చేశారు. ఈ అంశంపై త్వరలోనే బీబీసీపై దావా వేయనున్నట్లు ట్రంప్ స్పష్టం చేశారు. మంగళవారం మధ్యాహ్నం లేదా బుధవారం ఉదయం నాటికి న్యాయ ప్రక్రియ ప్రారంభమవుతుందని తెలిపారు. ఈ ఘటనను ఆయన ‘ఫేక్ న్యూస్’కు పరాకాష్టగా అభివర్ణించారు. ప్రస్తుతం వార్తల తయారీలో ఏఐ వినియోగంపై అమెరికా, ఐరోపా దేశాల్లో ఆందోళనలు పెరుగుతున్న తరుణంలో, ట్రంప్ వ్యాఖ్యలు మరింత ప్రాధాన్యం సంతరించుకున్నాయి. నిజానిజాలను నిర్ధారించకుండా టెక్నాలజీపై ఆధారపడటం ప్రజాస్వామ్యానికి ప్రమాదకరమని ఆయన అభిప్రాయపడ్డారు.
ఇదే సందర్భంగా చైనా మానవ హక్కుల అంశంపై కూడా ట్రంప్ స్పందించారు. హాంకాంగ్కు చెందిన ప్రముఖ మీడియా వ్యాపారి జిమ్మీ లై జైలు శిక్ష అనుభవిస్తున్న విషయం ప్రస్తావిస్తూ, ఆయన విడుదల కోసం తాను చైనా అధ్యక్షుడు జిన్పింగ్ను వ్యక్తిగతంగా కోరినట్లు వెల్లడించారు. జిమ్మీ లై వయసులో పెద్దవారు, ఆరోగ్య సమస్యలతో బాధపడుతున్నారు. మానవతా దృక్పథంతోనే ఈ విజ్ఞప్తి చేశాను అని ట్రంప్ తెలిపారు. దీనిపై బీజింగ్ నుంచి ఎలాంటి స్పందన వస్తుందన్న ప్రశ్నకు, “ఏం జరుగుతుందో వేచి చూద్దాం” అని సమాధానమిచ్చారు. బీబీసీపై ట్రంప్ ఆరోపణలు, ఏఐ వినియోగంపై ప్రపంచవ్యాప్తంగా జరుగుతున్న చర్చలకు కొత్త మలుపు ఇచ్చాయని విశ్లేషకులు అభిప్రాయపడుతున్నారు.