WPL 2026 : మహిళల ప్రీమియర్ లీగ్(Women’s Premier League) (WPL) 2026 సీజన్కు సంబంధించిన పూర్తి షెడ్యూల్ను భారత క్రికెట్ నియంత్రణ మండలి (BCCI) శనివారం అధికారికంగా ప్రకటించింది. కొత్త ఏడాది తొలి నెలలోనే ఈ ప్రతిష్టాత్మక టోర్నీ(tournament) ఆరంభం కానుండగా, దేశవ్యాప్తంగా ఉన్న క్రికెట్ అభిమానులకు ఇది మరో క్రికెట్ పండుగగా నిలవనుంది. జనవరి 9న తొలి మ్యాచ్తో సీజన్ ప్రారంభమవుతుంది. ఇందులో గత సీజన్ డిఫెండింగ్ ఛాంపియన్ ముంబై ఇండియన్స్, 2024 కప్ విజేత రాయల్ ఛాలెంజర్స్ బెంగళూరుతో తలపడనుంది. ఈ ఆసక్తికర ఆరంభ పోరుకు నవీ ముంబైలోని ప్రసిద్ధ డీవై పాటిల్ స్టేడియం వేదికగా ఏర్పాట్లు జరుగుతున్నాయి. ఈ ఏడాది లీగ్ను రెండు ప్రధాన నగరాల్లో నిర్వహించనున్నట్లు బీసీసీఐ ప్రకటించింది. తొలిదశ మ్యాచ్లు మొత్తం నవీ ముంబైలోనే జరగనున్నాయి. జనవరి 9 నుంచి 17 వరకు మొత్తం 11 లీగ్ మ్యాచ్లు అక్కడే జరుగుతాయి.
అత్యాధునిక సౌకర్యాలతో ఉన్న వేదికలో తొలి వారంలోనే అనేక హై వోల్టేజ్ మ్యాచ్లు జరగనున్నాయి. అనంతరం లీగ్ వేదిక గుజరాత్కు మారుతుంది. రెండో దశ నుంచి ప్లేఆఫ్స్ వరకు మొత్తం మ్యాచ్లకు వడోదరలోని కోటంబి స్టేడియం ఆతిథ్యం ఇవ్వనుంది. జనవరి 18 నుంచి ఫిబ్రవరి 5 వరకు జరిగే మిగిలిన 11 మ్యాచ్లు ఇక్కడే నిర్వహిస్తారు. ఫిబ్రవరి 5న జరిగే గ్రాండ్ ఫైనల్ కూడా ఇదే వేదికలో జరుగనుంది. లీగ్ దశ ఫిబ్రవరి 1న ముగియనుండగా, పాయింట్ల పట్టికలో రెండో, మూడో స్థానాల్లో నిలిచిన జట్లు ఫిబ్రవరి 3న ఎలిమినేటర్లో తలపడతాయి. ఇక టేబుల్టాపర్గా నిలిచిన జట్టు నేరుగా ఫైనల్లో అడుగుపెడుతుంది. గత మూడు ఎడిషన్లలో లాగానే ఈసారి కూడా లీగ్ కట్టుదిట్టమైన పోటీని అందించనుంది. మూడు సంవత్సరాలుగా ఫిబ్రవరి-మార్చి నెలల్లో జరిగిన ఈ టోర్నీ, అంతర్జాతీయ మ్యాచ్ల షెడ్యూల్తో పొరపడకుండా ఉండేందుకు ఈసారి జనవరి-ఫిబ్రవరి విండోలో నిర్వహించాలని బీసీసీఐ నిర్ణయించింది.
ఇటీవల ఢిల్లీలో జరిగిన మెగా వేలం అనంతరం జట్ల బలాబలాలు పూర్తిగా మారిపోయాయని, కొత్త ఆటగాళ్ల చేరికతో అన్ని జట్లు సమతూకంగా తయారయ్యాయని బీసీసీఐ కార్యదర్శి దేవాజిత్ సైకియా తెలిపారు. ప్రతి జట్టు ఈసారి మరింత శక్తివంతంగా కనిపిస్తోందని, 2026 సీజన్ ప్రేక్షకులకు మరింత రసవత్తర అనుభూతిని ఇవ్వనుందని ఆయన పేర్కొన్నారు. ఇప్పటి వరకు జరిగిన మూడు సీజన్లలో ముంబై ఇండియన్స్ రెండు సార్లు టైటిల్ గెలుచుకోగా, రాయల్ ఛాలెంజర్స్ బెంగళూరు ఒకసారి ట్రోఫీ ఎత్తి పట్టింది. మరోవైపు ఢిల్లీ క్యాపిటల్స్ మూడు సార్లూ రన్నరప్గా ముగించుకోవడం విశేషం. ఈ నేపథ్యంలో 2026 సీజన్లో ఏ జట్టు గెలుస్తుందన్న ఉత్కంఠ అభిమానుల్లో ఇప్పటికే మొదలైంది.
పూర్తి షెడ్యూల్ ఇదే..
నవీ ముంబైలో జరిగే మ్యాచ్లు..
జనవరి 9: ముంబై ఇండియన్స్ vs రాయల్ ఛాలెంజర్స్ బెంగళూరు
జనవరి 10: యూపీ వారియర్జ్ vs గుజరాత్ జెయింట్స్
జనవరి 10: ముంబై ఇండియన్స్ vs ఢిల్లీ క్యాపిటల్స్
జనవరి 11: ఢిల్లీ క్యాపిటల్స్ vs గుజరాత్ జెయింట్స్
జనవరి 12: రాయల్ ఛాలెంజర్స్ బెంగళూరు vs యూపీ వారియర్జ్
జనవరి 13: ముంబై ఇండియన్స్ vs గుజరాత్ జెయింట్స్
జనవరి 14: యూపీ వారియర్జ్ vs ఢిల్లీ క్యాపిటల్స్
జనవరి 15: ముంబై ఇండియన్స్ vs యూపీ వారియర్జ్
జనవరి 16: రాయల్ ఛాలెంజర్స్ బెంగళూరు vs గుజరాత్ జెయింట్స్
జనవరి 17: యూపీ వారియర్జ్ vs ముంబై ఇండియన్స్
జనవరి 17: ఢిల్లీ క్యాపిటల్స్ vs రాయల్ ఛాలెంజర్స్ బెంగళూరు
వడోదరలో జరిగే మ్యాచ్లివే..
జనవరి 19: గుజరాత్ జెయింట్స్ vs రాయల్ ఛాలెంజర్స్ బెంగళూరు
జనవరి 20: ఢిల్లీ క్యాపిటల్స్ vs ముంబై ఇండియన్స్
జనవరి 22: గుజరాత్ జెయింట్స్ vs యుపి వారియర్జ్
జనవరి 24: రాయల్ ఛాలెంజర్స్ బెంగళూరు vs ఢిల్లీ క్యాపిటల్స్
జనవరి 26: రాయల్ ఛాలెంజర్స్ బెంగళూరు vs ముంబై ఇండియన్స్
జనవరి 27: గుజరాత్ జెయింట్స్ vs ఢిల్లీ క్యాపిటల్స్
జనవరి 29: యుపి వారియర్జ్ vs రాయల్ ఛాలెంజర్స్ బెంగళూరు
జనవరి 30: గుజరాత్ జెయింట్స్ vs ముంబై ఇండియన్స్
ఫిబ్రవరి 1: ఢిల్లీ క్యాపిటల్స్ vs యుపి వారియర్జ్
ఫిబ్రవరి 3: ఎలిమినేటర్
ఫిబ్రవరి 5: ఫైనల్