మీరు ఎన్నో విషయాల్లో రతన్‌ టాటాను గుర్తుకు తెస్తారు: ఆనంద్ మహీంద్రా పై చిరంజీవి ప్రశంసలు

Chiranjeevi: మహీంద్రా గ్రూప్ ఛైర్మన్ ఆనంద్ మహీంద్రా(Anand Mahindra)పై మెగాస్టార్ చిరంజీవి(Megastar Chiranjeevi) హృదయపూర్వక ప్రశంసలు కురిపించారు. ఇటీవల హైదరాబాద్‌లో నిర్వహించిన ‘తెలంగాణ రైజింగ్ గ్లోబల్ సమిట్’(Telangana Rising Global Summit) సందర్భంగా ఇద్దరూ కలిసి పాల్గొనగా, ఆ సందర్భంలో తీసుకున్న ఫోటోను చిరంజీవి ఎక్స్‌లో పంచుకుంటూ తన అభిప్రాయాలను తెలియజేశారు. ఆనంద్ మహీంద్రా వ్యక్తిత్వం ఎంతో వినయపూర్వకంగా, తన విజయాలను సైతం అత్యంత సరళతతో మోసుకెళ్లే విధంగా ఉంటుందన్నారు. ఆయనను చూస్తుంటే సహజంగానే రతన్ టాటా(Ratan Tata) గారి విలువలు, జీవన విధానం గుర్తుకు వస్తాయంటూ మెగాస్టార్ తెలిపారు. ఎన్నో రంగాల్లో అగ్రగాములైన ఈ ఇద్దరు పరిశ్రమల ప్రతిభావంతులు సామాజిక సేవలపై చూపే నిబద్ధత ప్రజలకు ఎంతో ప్రేరణనిస్తుందని చిరు పేర్కొన్నారు.

“ప్రియమైన ఆనంద్ మహీంద్రా గారూ, మీ వినయం, మీ ఒదిగిన స్వభావం నిజంగానే ఆదర్శనీయమైనవి. మీరు అనేక విషయాల్లో రతన్ టాటా గారిని గుర్తుకు తెస్తారు. విలువలతో నిలకడగా ఎదిగి, లక్షల మందికి స్ఫూర్తిగా నిలిచిన ఆయన మాదిరిగానే, మీలో కూడా అలాంటి విశేషత స్పష్టంగా కనిపిస్తుంది. సేవా కార్యక్రమాలపట్ల మీకు ఉన్న అంకితభావం అందరికీ దారిదీపం. ఈ గొప్ప కార్యక్రమంలో మీతో పాటు ఉండే అవకాశం దక్కడం నాకు ఎంతో ఆనందంగా ఉంది” అని చిరంజీవి హృదయపూర్వకంగా రాశారు. ఈ కార్యక్రమంలో పాల్గొనే అవకాశాన్ని కల్పించినందుకు తెలంగాణ ముఖ్యమంత్రి రేవంత్ రెడ్డికి ఆయన ప్రత్యేక ధన్యవాదాలు తెలిపారు. రాష్ట్ర అభివృద్ధికి తీసుకుంటున్న ఐడియాలు, అమలు చేస్తున్న కార్యాచరణ పట్ల చిరంజీవి ప్రశంసలు వ్యక్తం చేశారు.

కాగా, ఇటీవలి నిర్వహించిన ‘తెలంగాణ రైజింగ్ గ్లోబల్ సమిట్’ ప్రాముఖ్యతపై కూడా మెగాస్టార్ మరో పోస్టు చేశారు. “తెలంగాణ రైజింగ్ 2047 విజన్‌లో భాగంగా అన్ని రంగాలకు సమాన ప్రాధాన్యత ఇవ్వటం అభినందనీయం. ముఖ్యంగా సినిమా, ఎంటర్‌టైన్‌మెంట్ రంగాన్ని గ్లోబల్ స్థాయికి తీసుకెళ్ళాలని తీసుకుంటున్న నిర్ణయం ఎంతో గొప్పది. హైదరాబాద్‌ను అంతర్జాతీయ ఫిల్మ్ మరియు వినోద కేంద్రంగా తీర్చిదిద్దాలనే రాష్ట్ర ప్రభుత్వ లక్ష్యం త్వరలోనే ఫలిస్తుంది. ప్రపంచ సినిమా దృష్టి హైదరాబాద్‌పై మరింతగా పడనుందనే నమ్మకం నాకు ఉంది” అని చిరంజీవి విశ్వాసం వ్యక్తం చేశారు. సమిట్‌లో పాల్గొన్న పరిశ్రమల ప్రముఖులు, స్టార్టప్స్, గ్లోబల్ నాయకులతో పాటు, ఈ కార్యక్రమం రాష్ట్ర ప్రతిష్టను మరోస్థాయికి తీసుకెళ్లిందని ఆయన అభినందించారు. తెలంగాణ భవిష్యత్తుకు ఈ సమిట్ ఒక కీలక అడుగు అని చిరంజీవి పేర్కొంటూ తన పోస్టులను ముగించారు.