Congress : తెలంగాణ(Telangana)లో జరిగిన రెండో విడత గ్రామ పంచాయతీ ఎన్నికల్లో( Gram Panchayat elections) అధికార కాంగ్రెస్ పార్టీ(Congress party)మరోసారి తన బలాన్ని చాటుకుంది. తొలి విడతలో సాధించిన విజయాలకు కొనసాగింపుగా, ఈ దఫా కూడా అత్యధిక సర్పంచ్ స్థానాలను దక్కించుకుని గ్రామీణ రాజకీయాల్లో తన ఆధిపత్యాన్ని నిలుపుకుంది. ఆదివారం నిర్వహించిన ఈ ఎన్నికల్లో కాంగ్రెస్ మద్దతుతో పోటీ చేసిన అభ్యర్థులు సగానికి మించిన స్థానాల్లో విజయం సాధించడం విశేషం. మొత్తంగా 3,911 గ్రామ పంచాయతీలకు ఎన్నికలు జరగగా, అందిన తాజా సమాచారం ప్రకారం కాంగ్రెస్ అనుకూల అభ్యర్థులు 2,200కు పైగా పంచాయతీల్లో గెలుపొందారు. దీంతో రాష్ట్రవ్యాప్తంగా గ్రామీణ స్థాయిలో కాంగ్రెస్ పట్టు మరింత బలపడినట్లు రాజకీయ విశ్లేషకులు పేర్కొంటున్నారు. మరోవైపు, ప్రధాన ప్రతిపక్షమైన బీఆర్ఎస్ కూడా గట్టి పోటీనే ఇచ్చింది.
దాదాపు 1,100కు పైగా పంచాయతీల్లో విజయాలు సాధించి రెండో స్థానంలో నిలిచింది. ఇక రాష్ట్రంలో ప్రత్యామ్నాయ శక్తిగా ఎదగాలని భావిస్తున్న బీజేపీ ఈ ఎన్నికల్లో పెద్దగా ప్రభావం చూపలేకపోయింది. సుమారు 250 స్థానాలకే పరిమితమైంది. అధికారంలోకి వచ్చిన తర్వాత జరిగిన తొలి గ్రామీణ ఎన్నికలు కావడంతో కాంగ్రెస్ ఈ పోరును ఎంతో ప్రతిష్ఠాత్మకంగా తీసుకుంది. ముఖ్యమంత్రి రేవంత్ రెడ్డి స్వయంగా వ్యూహరచన చేసి, మంత్రులు, ఎమ్మెల్యేలు క్షేత్రస్థాయిలో విస్తృతంగా ప్రచారం నిర్వహించారు. ఫలితంగా ఎక్కువ జిల్లాల్లో కాంగ్రెస్ స్పష్టమైన ఆధిక్యం కనబరిచింది. అయితే సిద్దిపేట, జనగామ, కుమురం భీం ఆసిఫాబాద్ జిల్లాల్లో బీఆర్ఎస్ తన ప్రభావాన్ని నిలుపుకుంది. ముఖ్యంగా మాజీ మంత్రి హరీశ్ రావు ప్రాతినిధ్యం వహించే నియోజకవర్గంలో బీఆర్ఎస్ మద్దతు అభ్యర్థులు ఎక్కువ స్థానాల్లో గెలుపొందడం గమనార్హం.
మరోవైపు నిర్మల్ జిల్లాలో బీజేపీ కొంత బలాన్ని ప్రదర్శించి మెజారిటీ స్థానాలు కైవసం చేసుకుంది. తీవ్ర చలిని కూడా లెక్కచేయకుండా ఓటర్లు పెద్ద సంఖ్యలో పోలింగ్లో పాల్గొన్నారు. రాష్ట్రవ్యాప్తంగా 85.86 శాతం పోలింగ్ నమోదు కావడం ప్రజల భాగస్వామ్యానికి నిదర్శనంగా నిలిచింది. కొన్ని చెదురుమదురు ఘటనలు తప్ప ఎన్నికల ప్రక్రియ ప్రశాంతంగా సాగింది. పోలింగ్ ముగిసిన వెంటనే అధికారులు ఓట్ల లెక్కింపు చేపట్టి, నిన్న సాయంత్రానికే గెలుపొందిన సర్పంచులు, వార్డు సభ్యుల వివరాలను అధికారికంగా ప్రకటించారు. ఈ ఫలితాలు రానున్న స్థానిక రాజకీయాలపై గణనీయమైన ప్రభావం చూపనున్నాయని విశ్లేషకులు అభిప్రాయపడుతున్నారు.