హైదరాబాద్‌–విజయవాడ జాతీయ రహదారి విస్తరణకు కేంద్రం నోటిఫికేషన్‌

Hyderabad -vijayawada Highway: హైదరాబాద్‌–విజయవాడ మధ్య ఉన్న 65వ జాతీయ రహదారి (NH-65) విస్తరణకు కేంద్ర ప్రభుత్వం (Central Govt) పచ్చజెండా ఊపింది. ఈ ప్రాజెక్ట్‌ కింద 40వ కిలోమీటరు నుంచి 269వ కిలోమీటరు వరకు, అంటే మొత్తం 229 కిలోమీటర్ల దూరం ఉన్న రహదారిని నాలుగు వరుసల నుంచి ఆరు వరుసలుగా (సిక్స్‌లేన్‌) విస్తరించనున్నారు. ఈ విస్తరణకు అవసరమైన భూసేకరణ ప్రక్రియను వేగవంతం చేసేందుకు కేంద్ర రహదారి, రవాణా మరియు హైవేస్‌ శాఖ మంగళవారం అధికారిక నోటిఫికేషన్‌ విడుదల చేసింది.

ఈ నోటిఫికేషన్‌ ప్రకారం, తెలంగాణ మరియు ఆంధ్రప్రదేశ్‌ రాష్ట్రాల్లో భూసేకరణ చర్యలను స్థానిక రెవెన్యూ అధికారుల ద్వారా చేపట్టనున్నారు. తెలంగాణలో యాదాద్రి భువనగిరి, నల్గొండ, సూర్యాపేట జిల్లాల్లో భూసేకరణకు సంబంధించిన ప్రక్రియలు మొదలుకానున్నాయి. యాదాద్రి భువనగిరి జిల్లా చౌటుప్పల్‌ మండలంలో 9 గ్రామాలు, నల్గొండ జిల్లాలో చిట్యాల మండలంలో 5 గ్రామాలు, నార్కెట్‌పల్లి మండలంలో 5 గ్రామాలు, కట్టంగూర్‌లో 4, నకిరేకల్‌లో 2, కేతేపల్లిలో 4 గ్రామాలు ఈ విస్తరణలో ప్రభావితమయ్యే అవకాశం ఉంది. సూర్యాపేట జిల్లాలోని సూర్యాపేట మండలంలో 4 గ్రామాలు, చివ్వెంల మండలంలో 6 గ్రామాలు, కోదాడ మండలంలో 4 గ్రామాలు, మునగాల మండలంలో 5 గ్రామాల్లో భూసేకరణ బాధ్యతలను ఆయా మండలాల రెవెన్యూ డివిజనల్‌ ఆఫీసర్లకు (ఆర్డీఓ) అప్పగించారు.

ఆంధ్రప్రదేశ్‌ రాష్ట్రంలో కూడా ఈ ప్రాజెక్టు కింద పలు మండలాలు వస్తున్నాయి. ఎన్టీఆర్‌ జిల్లాలోని నందిగామ మండలంలో 4 గ్రామాలు, కంచికచర్ల మండలంలో 4, జగ్గయ్యపేట మండలంలో 7, పెనుగంచిప్రోలు మండలంలో 3, ఇబ్రహీంపట్నం మండలంలో 12 గ్రామాలు, విజయవాడ రూరల్‌ మండలంలో 1 గ్రామం, విజయవాడ వెస్ట్‌ మండలంలో 2 గ్రామాలు, విజయవాడ నార్త్‌ పరిధిలోని 1 గ్రామంలో భూసేకరణ పనులు చేపట్టేందుకు అక్కడి జాయింట్‌ కలెక్టర్లను బాధ్యత వహించేలా నియమించారు. కేంద్ర ప్రభుత్వం ఈ విస్తరణ ప్రాజెక్టును నేషనల్‌ హైవేస్‌ అథారిటీ ఆఫ్‌ ఇండియా (NHAI) ఆధ్వర్యంలో అమలు చేయనుంది. రహదారి విస్తరణ పూర్తయితే హైదరాబాద్‌–విజయవాడ మధ్య ప్రయాణ సమయం గణనీయంగా తగ్గనుంది. సరుకు రవాణా వేగవంతమవడంతో పాటు రవాణా రంగానికి కొత్త ఊపిరి లభిస్తుందని నిపుణులు అభిప్రాయపడుతున్నారు. భూసేకరణ ప్రక్రియ పూర్తైన వెంటనే నిర్మాణ పనులు ప్రారంభమవుతాయని కేంద్ర రహదారి శాఖ వర్గాలు తెలిపాయి. ప్రాజెక్టు పూర్తి కాగానే ఈ రహదారి ప్రాంతీయ ఆర్థికాభివృద్ధికి, పరిశ్రమల విస్తరణకు, పర్యాటక అభివృద్ధికి కూడా దోహదపడనుంది. తెలంగాణ, ఆంధ్రప్రదేశ్‌ రాష్ట్రాల మధ్య అనుసంధానాన్ని మరింత బలోపేతం చేసే ఈ హైవే విస్తరణపై స్థానిక ప్రజల్లో కూడా ఉత్సాహం వ్యక్తమవుతోంది.