Delhi air pollution : దేశ రాజధాని ఢిల్లీ(Delhi)లో గాలి నాణ్యత(air quality) రోజురోజుకీ దిగజారిపోతుండటం ప్రజలను తీవ్రంగా కలవరపెడుతోంది. పెరుగుతున్న వాయు కాలుష్యం(Air pollution) కారణంగా పిల్లలు, వృద్ధులు పెద్ద ఎత్తున ఆరోగ్య సమస్యలను ఎదుర్కొంటున్న నేపథ్యంలో, కాంగ్రెస్ అగ్రనేత్రి సోనియా గాంధీ(Sonia Gandhi) తీవ్ర ఆందోళన వ్యక్తం చేశారు. వాతావరణాన్ని శుద్ధి చేసేందుకు ప్రభుత్వం అత్యవసర చర్యలు తీసుకోవాలని ఆమె స్పష్టం చేశారు. గురువారం పార్లమెంట్ ఆవరణలో ప్రతిపక్ష పార్టీల నేతలు వాయు కాలుష్య సమస్యపై నిరసనలు చేపట్టారు. మాస్కులు ధరించి, కాలుష్య నియంత్రణపై చర్యలు తీసుకోవాలని ప్రభుత్వాన్ని కోరుతూ ప్లకార్డులు ప్రదర్శించారు. ప్రధాని మాటలకే పరిమితం కాకుండా, ప్రాథమిక సమస్యలను పరిష్కరించే దిశగా కదలాలని నినాదాలు చేశారు.
ఈ నిరసనలో సోనియా గాంధీ, కాంగ్రెస్ అధ్యక్షుడు మల్లికార్జున ఖర్గేతో పాటు పలు ముఖ్య నేతలు పాల్గొన్నారు. పత్రికా ప్రతినిధులతో మాట్లాడిన సోనియా గాంధీ, ఢిల్లీలోని కాలుష్య పరిస్థితులు పిల్లల ప్రాణాలను ముప్పుకు గురిచేస్తున్నాయి. వృద్ధులు శ్వాస తీసుకోవడానికే ఇబ్బంది పడుతున్నారు. ఇటువంటి ప్రమాదకర పరిస్థితుల్లో ప్రభుత్వం వెంటనే కఠిన చర్యలు తీసుకోవాలి అని తెలిపారు. వాయు కాలుష్యాన్ని చిన్న సమస్యగా చూడకూడదని, దీనివల్ల ఉద్భవిస్తున్న ఆరోగ్య సంక్షోభాన్ని ప్రభుత్వం గమనించాలని ఆమె కోరారు. ఈ నేపథ్యంలో కాంగ్రెస్ ఎంపీ ప్రియాంక గాంధీ కూడా స్పందిస్తూ, పార్లమెంట్లో వాయు కాలుష్యంపై విశ్లేషణాత్మక చర్చ జరగాల్సిన అవసరం ఉందని అన్నారు. ఇలాంటి వాతావరణంలో ప్రజలు ఎలా జీవించాలి? బయట పరిస్థితులను ఒకసారి చూడండి. పిల్లలు సరిగా ఊపిరి పీల్చుకోలేకపోతున్నారు. వృద్ధులు శ్వాసకోశ సమస్యలతో తీవ్రంగా బాధపడుతున్నారు.
ప్రతి ఏడాది ఈ పరిస్థితి మరింత చెడ్డదవుతోంది. ప్రభుత్వం మాటలకే పరిమితం కాకుండా చర్యలు తీసుకోవాలి. ఇది రాజకీయ సమస్య కాదు..మనుషుల ప్రాణాల ప్రశ్న అని ఆమె వ్యాఖ్యానించారు. శీతాకాల సమావేశాలు జరుగుతున్న ఈ సమయంలో వాయు కాలుష్యంపై చర్చ జరపాలంటూ కాంగ్రెస్ ఎంపీలు నోటీసులు కూడా ఇచ్చారు. పార్టీ ఎంపీ మాణికం ఠాగూర్ మాట్లాడుతూ, కాలుష్య నియంత్రణపై ప్రభుత్వం ఏ చర్యలు తీసుకోకుండా కేవలం సలహాలు మాత్రమే ఇస్తోంది. ప్రజలు ఆరోగ్యపరమైన ప్రమాదాలతో పోరాడుతుండగా కేంద్రం నిర్లక్ష్యం ప్రదర్శిస్తోంది అని విమర్శించారు. ఢిల్లీ వాయు కాలుష్య సమస్య ప్రతి సంవత్సరం తీవ్రంగా ఉధృతమవుతున్న నేపథ్యంలో, ప్రజల ఆరోగ్య రక్షణ కోసం కేంద్ర, రాష్ట్ర ప్రభుత్వాలు తక్షణం సమగ్ర చర్యలు తీసుకోవాలని ప్రతిపక్షాల డిమాండ్ మరింత బలపడుతోంది.