Supreme Court: వీధి కుక్కల నియంత్రణ(Control of stray dogs)పై జరుగుతున్న ప్రధాన కేసులో పలు రాష్ట్రాల ప్రధాన కార్యదర్శుల(Chief Secretaries of States) (సీఎస్‌లు) పట్ల సుప్రీంకోర్టు తీవ్ర అసహనం వ్యక్తం చేసింది. కోర్టు గత ఆగస్టు 22న ఇచ్చిన ఆదేశాలను పాటించని రాష్ట్ర అధికారులు మరియు కేంద్ర పాలిత ప్రాంతాల మున్సిపల్ అధికారులు నవంబర్ 3న జరిగే తదుపరి విచారణకు తప్పనిసరిగా భౌతికంగా హాజరు కావాల్సినట్లు స్పష్టంగా పేర్కొంది. దీనికి విరుద్ధంగా వర్చువల్ హాజరు అనుమతించాలని సొలిసిటర్ జనరల్ తుషార్ మెహతా కోరినా, ధర్మాసనం ఆ అభ్యర్థనను తేల్చిపెట్టి తిరస్కరించింది. శుక్రవారం సొలిసిటర్ జనరల్ తుషార్ మెహతా జస్టిస్ విక్రమ్ నాథ్, జస్టిస్ సందీప్ మెహతాతో కూడిన ధర్మాసనం ముందు సదరు సీఎస్‌లను వర్చువల్‌గా హాజరు కావడానికి అనుమతించాలని ప్రస్తావించారు. దీని పై ధర్మాసనం తీవ్ర అసహనాన్ని వ్యక్తం చేస్తూ మేము కంప్లయన్స్ అఫిడవిట్లు దాఖలు చేయమని ఆదేశిస్తే, వారు నిద్రపోతున్నారు. కోర్టు ఆదేశాల పట్ల ఎలాంటి గౌరవం లేదు. సరే, అయితే వారే రానివ్వండి అని జస్టిస్ విక్రమ్ నాథ్ ఘాటుగా వ్యాఖ్యానించారు.
వీధి కుక్కల నియంత్రణ చర్యల పట్ల పశ్చిమ బెంగాల్, తెలంగాణ మినహా అన్ని రాష్ట్రాల సీఎస్‌లు నవంబర్ 3న భౌతికంగా హాజరు కావాలని సుప్రీంకోర్టు అక్టోబర్ 27న ఆదేశించింది. ఆగస్టు 22న, కోర్టు ఈ కేసును ఢిల్లీ-ఎన్‌సీఆర్ ప్రాంతాల పరిమితి నుంచి దేశవ్యాప్తంగా విస్తరించింది. జంతు జనన నియంత్రణ (ఏబీసీ) నిబంధనలను అమలు చేయడానికి అవసరమైన వనరులు డాగ్ పౌండ్స్, పశువైద్యులు, కుక్కలను పట్టే సిబ్బంది, వాహనాలు, బోనులు మరియు వాటి గణాంకాలను అన్ని రాష్ట్రాలు, కేంద్ర పాలిత ప్రాంతాల మున్సిపల్ అధికారులు అఫిడవిట్ రూపంలో సమర్పించాల్సి ఉందని కోర్టు స్పష్టం చేసింది. అంతేకాక, కోర్టు ఏబీసీ నిబంధనలు దేశవ్యాప్తంగా సమానంగా అమలు కావాలని పేర్కొని, అన్ని రాష్ట్రాలను ఈ కేసులో ప్రతివాదులుగా చేర్చింది. జూలై 28న, ఢిల్లీలో వీధి కుక్కల కాటు వల్ల చిన్నారులు రేబిస్ బారిన పడుతున్నారన్న మీడియా కథనాల ఆధారంగా సుప్రీంకోర్టు ఈ కేసును సుమోటోగా స్వీకరించి విచారణ ప్రారంభించింది. కేసు ఫలితంగా, రాష్ట్ర ప్రభుత్వాలు ఈ సమస్యను తక్షణమే పరిష్కరించాలని, అన్ని అవసరమైన వనరులను సమకూర్చి, సమగ్ర నివేదికలు సమర్పించాలని కోర్టు గుర్తు చేసింది. ఈ కేసు దేశవ్యాప్తంగా వీధి కుక్కల నియంత్రణ విధానాలపై కీలక పరిణామాలను సూచిస్తోంది.