Parliament Winter Session: పార్లమెంట్ శీతాకాల సమావేశాలు ఈరోజు ఉదయం 11 గంటలకు అధికారికంగా ప్రారంభమయ్యాయి. లోక్‌సభ, రాజ్యసభలు(Lok Sabha and Rajya Sabha)సమావేశమైన వెంటనే ఇటీవలి కాలంలో మరణించిన మాజీ, ప్రస్తుత సభ్యులను స్మరించుకుంటూ సంతాప తీర్మానాలను ఆమోదించాయి. ఈ ప్రక్రియ అనంతరం అసలు శాసన కార్యక్రమాలకు రంగం సిద్ధమైంది. కేంద్ర ప్రభుత్వం ఈ సమావేశాల్లో మొత్తం 14 ప్రధాన బిల్లులను ప్రవేశపెట్టేందుకు సిద్ధమవుతోంది. సంస్కరణల దిశగా ముందడుగులు వేయాలనే సంకల్పంతో సెక్యూరిటీస్ మార్కెట్స్ కోడ్, ఉన్నత విద్యా కమిషన్ ఏర్పాటు, అణు ఇంధన రంగం మార్పులు, కార్పొరేట్ చట్టం సవరణలు, బీమా రంగానికి సంబంధించిన మార్పులు, జాతీయ రహదారుల చట్టం సవరణ వంటి కీలక బిల్లులను సభ ముందుకు తీసుకురావాలని ప్రభుత్వం లక్ష్యంగా పెట్టుకుంది. ఈ బిల్లులు ఆర్థిక, విద్యా, మౌలిక సదుపాయాల రంగాల్లో పెద్ద మార్పులకు దారితీయవచ్చని రాజకీయ వర్గాలు అంచనా వేస్తున్నాయి.
ఇదిలా ఉండగా, ప్రతిపక్ష పార్టీలన్నీ ప్రజా సమస్యలను కేంద్రంగా చేసుకుని ప్రభుత్వాన్ని కఠిన ప్రశ్నలకు గురిచేయడానికి వ్యూహాలు సిద్ధం చేశాయి. ముఖ్యంగా నాలుగు కొత్త లేబర్ కోడ్‌ల అమలు, ఢిల్లీలో ఇటీవల చోటుచేసుకున్న పేలుడు ఘటన, దేశవ్యాప్తంగా పెరుగుతున్న కాలుష్య స్థాయిలు, జాతీయ భద్రతా అంశాలు, రైతులకు కనీస మద్దతు ధర (MSP) హామీ విషయాలను సభలో ప్రస్తావించేందుకు ప్రతిపక్షాలు సిద్ధమవుతున్నాయి. ఓటర్ల జాబితా సవరణపై చర్చించాలంటూ కాంగ్రెస్ పార్టీ లోక్‌సభలో వాయిదా తీర్మానం కూడా ప్రవేశపెట్టింది. ఎన్నికల వ్యవస్థలో పారదర్శకత పై దేశవ్యాప్తంగా చర్చ జరుగుతున్న సందర్భంలో ఈ తీర్మానానికి ప్రాధాన్యత ఏర్పడింది. రాజ్యసభ విషయానికి వస్తే, కొత్తగా ఎన్నికైన ఉపరాష్ట్రపతి రాధాకృష్ణన్ అధ్యక్షతన ప్రారంభమైన మొదటి సమావేశాలు కావడం విశేషం. కొత్త నాయకత్వం కింద సభ ఎలా నడుస్తుందన్నదానిపై రాజకీయ వర్గాలు ఆసక్తిగా గమనిస్తున్నాయి. డిసెంబర్ 19 వరకు కొనసాగే ఈ శీతాకాల సమావేశాలు మొత్తం 15 రోజులపాటు నిర్వహించబడతాయి. తక్కువ సమయం ఉండడంతో బిల్లుల చర్చ, ప్రజా సమస్యలపై వాదోపవాదాలు, వివిధ కమిటీల నివేదికలు వంటి అంశాలు గట్టి రీతిలో కొనసాగనున్నాయి. ప్రభుత్వానికి శాసన కార్యాచరణను వేగంగా పూర్తి చేయాల్సిన బాధ్యత ఉండగా, ప్రతిపక్షాలకు ప్రజా సమస్యలపై ప్రభుత్వాన్ని నిలదీసే అవకాశంగా ఈ సమావేశాలు మారాయి.
మరోవైపు పార్లమెంట్ శీతాకాల సమావేశాలను కుదించడంపై ప్రతిపక్షాలు విమర్శలు గుప్పించాయి. సాధారణంగా ఈ సమావేశాలు 20 రోజులు జరుగుతాయి. అయితే, ఈసారి 15 రోజుల పాటు మాత్రమే జరగనున్నాయి. నేటి నుంచి ఈ నెల 19 వరకు సమావేశాలు జరగనుండగా, ఇందులో నాలుగు రోజులు సెలవులు ఉన్నాయి. శీతాకాల సమావేశాలను కుదించడంపై శివసేన (ఉద్దవ్ ఠాక్రే) ఎంపీ ప్రియాంక చతుర్వేది విమర్శలు చేశారు. పార్లమెంట్ సమావేశాలను సజావుగా జరిపే ఉద్దేశం అధికార పక్షానికి ఉన్నట్లు కనిపించడం లేదని ప్రియాంక చతుర్వేది అన్నారు. అహంకారంతో ప్రతిచోట అధికారం నిలుపుకుంటామనే భావన వారిలో కనిపిస్తోందని వ్యాఖ్యానించారు. పార్లమెంటరీ విధానాలను అనుసరించాల్సిన అవసరం లేదని వారి అభిప్రాయంగా కనిపిస్తోందని అన్నారు. కేవలం 15 రోజులలో 13 బిల్లులు తీసుకురావాలని చూస్తున్నారని, అంటే వీటిపై సరైన చర్చ జరగాలని వారు కోరుకోవడం లేదని అన్నారు. నిరసనల మధ్య ఈ బిల్లులను ఆమోదించాలని చూస్తున్నారని ఆరోపించారు.
