నాలుగు రాష్ట్రాల్లో ఉప ఎన్నికల నగారా.. షెడ్యూల్ విడుదల

ECI: దేశంలోని నాలుగు రాష్ట్రాల్లో ఖాళీగా ఉన్న ఐదు అసెంబ్లీ నియోజకవర్గాలకు ఉప ఎన్నికల (By-elections) నగారా మోగింది. భారత ఎన్నికల సంఘం (ECI) అక్టోబర్ 9న అధికారిక నోటిఫికేషన్ విడుదల చేస్తూ, పూర్తి షెడ్యూల్‌ను వెల్లడించింది. తాజా షెడ్యూల్(Schedule release) ప్రకారం, నవంబర్ 11న ఓటింగ్ జరుగగా, నవంబర్ 14న ఓట్ల లెక్కింపు చేపడతామని స్పష్టం చేసింది. ఈసారి ఉప ఎన్నికలు జరగనున్న ఐదు స్థానాలు – రాజస్థాన్‌లోని అంటా, ఒడిశాలోని నువాపడ, పంజాబ్‌లోని తర్న్ తారన్, జమ్మూకశ్మీర్‌లోని నాగ్రోటా, బుద్గాం నియోజకవర్గాలుగా ఉన్నాయి.

రాజస్థాన్ – అంటా నియోజకవర్గం ఖాళీకి కారణం..

రాజస్థాన్‌లోని అంటా (193) నియోజకవర్గ ఎమ్మెల్యే కన్వర్ లాల్ మీనాపై 20 ఏళ్ల క్రితం నమోదైన క్రిమినల్ కేసులో ఇటీవల కోర్టు తీర్పు వెలువడింది. దీంతో ఆయనపై అనర్హత వేటు పడింది. స్పీకర్ వాసుదేవ్ దేవనాని ఈ ఏడాది మే 23న ఆయన సభ్యత్వాన్ని రద్దు చేశారు. ఈ స్థానానికి నామినేషన్ల ప్రక్రియ అక్టోబర్ 21 నుంచి ప్రారంభం కానుంది.

ఒడిశా – నువాపడ ఎమ్మెల్యే మృతి..

ఒడిశాలోని నువాపడ (71) నియోజకవర్గ బీజేడీ ఎమ్మెల్యే రాజేంద్ర ధొలాకియా ఆరోగ్య కారణాలతో సెప్టెంబర్ 8న చెన్నైలో చికిత్స పొందుతూ కన్నుమూశారు. దీంతో ఈ స్థానానికి ఉప ఎన్నిక అనివార్యమైంది. నామినేషన్ల ప్రక్రియ అక్టోబర్ 20 నుంచి ప్రారంభం అవుతుంది.

పంజాబ్ – తర్న్ తారన్ స్థానానికి ఎన్నికలు..

పంజాబ్‌లోని తర్న్ తారన్ (21) నియోజకవర్గ ఆమ్ ఆద్మీ పార్టీ ఎమ్మెల్యే కశ్మీర్ సింగ్ సోహల్ ఇటీవల మరణించడంతో ఆ స్థానం ఖాళీ అయింది. ఈ స్థానానికి కూడా అక్టోబర్ 21నుంచి నామినేషన్లు స్వీకరించనున్నారు.

జమ్మూకశ్మీర్ – రెండు స్థానాలకు ఉప ఎన్నికలు..

జమ్మూకశ్మీర్‌లోని నాగ్రోటా (77), బుద్గాం (27) నియోజకవర్గాల్లో ఉప ఎన్నికలు జరగనున్నట్లు ఈసీఐ వెల్లడించింది. ఈ రెండు స్థానాల ఖాళీలకు సంబంధించి అధికారిక వివరాలు వెల్లడించకపోయినా, షెడ్యూల్ మాత్రం విడుదలైంది. ఈ రెండు స్థానాలకు కూడా నామినేషన్ల దాఖలు, పరిశీలన, ఉపసంహరణ ప్రక్రియలు అక్టోబర్ చివరి వారం నాటికి పూర్తి చేయనున్నారు.

 నవంబర్ 11న ఓటింగ్ తేదీ

ఈ అయిదు అసెంబ్లీ నియోజకవర్గాల్లో నవంబర్ 11న ఉదయం 7 గంటల నుంచి సాయంత్రం 6 గంటల వరకు ఓటింగ్ జరగనుంది. ఓట్ల లెక్కింపు నవంబర్ 14న ఉంటుంది. ఎన్నికల షెడ్యూల్ వెలువడిన వెంటనే ఆయా నియోజకవర్గాల్లో మోడల్ కోడ్ ఆఫ్ కండక్ట్ అమలులోకి వచ్చింది. అభ్యర్థుల ప్రచార కార్యకలాపాలు, ప్రచార పరిమితులు, ఎలక్ట్రానిక్, ముద్రిత మాధ్యమాల ప్రచారంపై నియంత్రణలూ విధింపబడనున్నాయి. ఈ ఉప ఎన్నికలు రాజకీయంగా ప్రాధాన్యం సంతరించుకున్నాయి. ఆయా ప్రాంతాల్లోని పార్టీలూ ఇప్పటినుంచే ఎన్నికల సమరానికి రంగం సిద్ధం చేస్తున్నాయి.