Sreeleela: టాలీవుడ్‌లో ఇప్పుడు అత్యంత బిజీగా ఉన్న హీరోయిన్లలో శ్రీలీల (Sreeleela) పేరు ముందుంటుంది. ఒక్క తెలుగు సినిమాలకే పరిమితం కాకుండా, బాలీవుడ్‌లో కూడా అవకాశాలను అందిపుచ్చుకుంటూ తన ప్రత్యేకతను చాటుకుంటున్నారు. ప్రస్తుతం ఆమె కెరీర్‌లో రెండు భారీ ప్రాజెక్టులు అత్యంత కీలకం కానున్నాయి. పవర్ స్టార్ పవన్ కళ్యాణ్‌(Pawan Kalyan)తో చేస్తున్న ఉస్తాద్ భగత్ సింగ్(Ustad Bhagat Singh), అలాగే మాస్ మహారాజ్ రవితేజ (Ravi Teja)తో కలిసి నటిస్తున్న మాస్ జాతర(Maas jatara). ఈ రెండు సినిమాల పైనే ఇప్పుడు శ్రీలీల అన్ని ఆశలు పెట్టుకున్నారు. సినిమా షూటింగులతో బిజీగా ఉన్నప్పటికీ, శ్రీలీల అభిమానులతో తరచూ మమేకమవుతూ పలు ఈవెంట్లలో, షోలలో పాల్గొంటున్నారు. అప్పుడప్పుడు ఇంటర్వ్యూలలో తన వ్యక్తిగత విషయాలపై కూడా ఓపెన్‌గా మాట్లాడడం ఆమెకు అలవాటే. తాజాగా జరిగిన ఓ ఇంటర్వ్యూలో, తన పెళ్లి విషయంపై ఆమె చేసిన వ్యాఖ్యలు ప్రస్తుతం సోషల్ మీడియాలో చర్చనీయాంశంగా మారాయి.
తన భవిష్యత్ భర్త గురించి మాట్లాడుతూ శ్రీలీల చెప్పిన మాటలు ఆలోచనాత్మకంగా ఉన్నాయి. నా కాబోయే వ్యక్తి అందంగా ఉండాలి అనేది నాకు పెద్ద ప్రాధాన్యం కాదు. కానీ అతను నన్ను అర్థం చేసుకునే మనసు కలిగి ఉండాలి. నా వృత్తి పట్ల గౌరవం చూపుతూ, నా కెరీర్‌కు మద్దతుగా ఉండే వ్యక్తి కావాలి అని ఆమె తెలిపింది. అంతేకాకుండా నా జీవితంలోకి వచ్చే వ్యక్తి సరదాగా ఉండాలి, నన్ను హాస్యంతో ఉంచగలగాలి. అంతే కాదు, ప్రతి విషయంలోనూ నిజాయితీతో ఉండే వ్యక్తి అయితే నేను ఖచ్చితంగా పెళ్లి చేసుకుంటాను అని చెప్పింది. శ్రీలీల ఈ వ్యాఖ్యలు విన్న నెటిజన్లు విభిన్నంగా స్పందిస్తున్నారు. కొందరు ఆమె అభిప్రాయాలను ప్రశంసిస్తూ, ఇలాంటి ఆలోచన ఉన్న అమ్మాయిలు ఆధునిక సమాజానికి ఆదర్శం అని చెబుతుంటే, మరికొందరు సరదాగా ఇన్ని మంచి లక్షణాలు ఉన్న అబ్బాయి ఈ కాలంలో దొరకడం కష్టమే! అని కామెంట్లు చేస్తున్నారు.
ఇక, సినీ వర్గాల మాటల్లో, శ్రీలీల ప్రస్తుతం కెరీర్ పీక్స్‌లో ఉన్నందున, త్వరలో ఆమె పెళ్లి గురించి ఎలాంటి నిర్ణయం తీసుకునే అవకాశం తక్కువే అని అంటున్నారు. అయితే ఆమె చెప్పిన మాటలు ఆమె వ్యక్తిత్వం, ఆలోచనా విధానం ఎంత స్థిరంగా ఉందో చూపిస్తున్నాయి. స్టార్‌డమ్ మధ్య కూడా జీవితం, సంబంధాల పట్ల సున్నితమైన దృష్టితో ఆలోచించడం శ్రీలీలను ప్రత్యేకంగా నిలబెడుతోంది. ఇక, ముందు ఆమె నటిస్తున్న సినిమాలు హిట్ అయితే, శ్రీలీల టాలీవుడ్ టాప్ హీరోయిన్‌గా తన స్థానం మరింత బలపరచుకోవడం ఖాయం. అప్పటివరకు, ఆమె భవిష్యత్ భర్తకు సంబంధించిన ఈ వ్యాఖ్యలే అభిమానుల మధ్య చర్చల కేంద్రంగా మారాయి.